منتديات مرادي

أهلا وسهلا بك زائرنا الكريم، إذا كانت هذه زيارتك الأولى للمنتدى، فيرجى التكرم بزيارة صفحة التعليمـــات، كما يشرفنا أن تقوم بالتسجيل بالضغط على التسجيل إذا رغبت بالمشاركة في المنتدى


    قال كندا قال

    شاطر
    avatar
    عبد الله مرادي
    عضو مميز محترف
    عضو مميز محترف

    عدد الرسائل : 610
    العمر : 30
    السٌّمعَة : 13
    نقاط : 4969
    تاريخ التسجيل : 05/12/2007
    24112009

    default قال كندا قال

    مُساهمة من طرف عبد الله مرادي

    الله أكبر .... مش مصدق حالي .... أخيرا اتخرجت ....خلص لازم أشوف حالي و(الأحلام تصبح حئيئه) ...............وبرهوم السطل اتخرج معي ..... والله ألف مبروك يا برهوم بعد ست سنين دراسة أخذت الليسانس يا باشا.
    شو رأيك اندور على شغل مع بعض؟
    وبالفعل كانت هذه بداية القصة,,,,,,,,,,,,,,,,,,,,,,,
    صرنا نروح على مشغل الخراطة تبع يوسف ابن أبو يسري في شارع الشابسوغ _ وهو زميل سابق لي في المدرسة في الصف الثاني جيم _ ونشتري جريدة أنا وبرهومه ولأنو ما معنا قلم وعادي جدا انو يوسف ما بستعمل هيك شغلات .... كنا بنقص الإعلانات تبعة الوظائف ونجمعها ونتصل فيها .....و أبوكي يالفاكسات وهنا كانت الصدمة العظيمة التي كنا نسمع عنها ولا نصدقها.
    (((حبيبي ..بدنا ناس معهم خبرة ...... طراخ توت توت توت ))) .
    تبهدلنا واحنا بندور عشغل ... ويوسف بزيد الطين بله وبقولي : والله ياخوي يا رائد ايدي ورمانه ... خايف انو معاي سرطعون ؟؟؟؟ والله ما حدا كسبانها غيرك يا يوسف بتعرفش الأردن بأي قاره وما بتعرف قبلة.. ().

    ويوم من الايام اتصلت فيي شركة .... صوت بنت حلو ..... أستاز رائد ....عندك مئابلة الساعة 08:45 سباحا مع الأستاذ إياد مدير الشركة ... بليز أوعى تتأخر؟؟؟؟

    ول شو هالدقة... و 45 دقيقه؟؟؟.... ومدير الشركة كمان ...والله لعبت معك يابو الرور... الشلن اللي اعطيته للشحاذ عالاشارة جاب نتيجه ... صحيح انو كان بدو يبزق بوجهي ... بس ماعلينا ...اتصلت ببرهوم ابشره .... واذا الشركة متصله فيه كمان عشان المقابلة الساعة 08:45 .....معقووووول .... بنفس الوئت على قولة السكرتيره.

    على العموم جهزت بدلة التخرج ... وعلبة الجل الأنيتا....والكرافته الزرقا .... وحلقت لحيتي وجهين ... يمين وشمال ... قصدي تحت وفوق ....يعني جهزت كل عدة النصب ودخلت على موقع Bayt عشان أعرف اساسيات المقابلة ... كيف تقعد؟ وكيف تطلع بالمقابل؟ وكيف تجاوب؟ وكيف تهز راسك؟ ... ووين تحط ايديك (0) ... بلا مؤاخذه ....ونمت بدري عشان اصحى عالسبعة شارب.
    تلاقيت أنا وبرهوم عشان نطلع عشارع الجاردنز .... عشان نقابل الاستاذ اياد .... نزلنا عالمجمع وطلعنا بالباصات ... عمارة أزنقنا... مكتب 32 ..الدور الثالث .... وبلش قلبي يدق .... وبلشت اقرا اية الكرسي.

    دخلنا الشركة ... والا هي مكتب غرفتين .... سكرتيره قد البقره كل وجهها حب وبتعلك...وبتحكي تلفون مع واحد شكله معلقها ....مراسل مصري قرفان بنطلونه ساحل وبربوره نازل ... وبوفيه عبارة عن فجوة في الحيط فيها غاز كهربا عينتين و ابريق شاي نحاس (مشحبر القاعدة)....شنطات ايد مزتوته يمين وشمال ... قلنا مش مشكلة ممكن هادا ستالايت برانش.
    اتفدلوا .... مين حدراتكم ؟ رائد العبيدي .... ابراهيم سموره .... او كي دئيئه.
    اتفدلوا الاستاذ اياد بستناكم .....
    لحظة الحسم....
    السلام عليكم.... وعليكم السلام اتفضلوا يا شباب....اقعدوا ... قعدنا
    وغافلنا الاستاذ اياد بمقدمة ابن خلدون عن الشركة وانو اصلها كندي ( عرفت هالحكي لأنو علم الاردن عيمينو وعلم كندا عشماله ورا الكرسي الجلد المخزوق اللي قاعد عليه).
    طيب.... احنا عبارة عن فرع لشركة وورلد تريدينك كنيديان دايركت سيلز .... وهي عبارة عن شركة عالمية ... الها مليون فرع في العالم ….اسست الشركة عام بربربربربربربربربربربربربربربربر
    أي اسئلة لحد هلأ .... لأ (احنا فهمنا اشي لسه عشان نسأل)
    مبدئيا احنا عنا فرص في المبيعات المباشرة وتطوير المبيعات .... وعشان ما عندكم خبرة بلشوا معنا في المبيعات ورح تتطوروا وظيفيا خلال فتره قياسية والمستئبل بستناكم.
    ماشي يا سيدي.... ايمتن الدوام ....من هلأ ازا بدكم بس كل واحد يجيب معه جواز السفر .... ( فكرت انو في دورات خارجيه ) والا هو طلع عشان ما نهرب بالبضاعة (زي ما بنعمل بالمصاروه).
    والبضاعة عبارة عن مشط بطير وقلم بنط وقداحة بتصير لوكس وساعة بترقص......
    طب كيف بدنا نبيع هيك شغلات .... بسيطه كل واحد بنسلمه شنطه بحط فيها البضاعة وبدور فيها على المستهلكين مباشرة .... عشان احنا دايركت سيلز .... ونسبتكم 10% من المبيعات وبالاخير شجعنا الاستاذ اياد وقال ((( إنا ما وصلت لمركزي هادا إلا لما بلشت زيكم حبايبي))) .
    اطلعت عالزلمه.... مكتبه كله غبرة ... لحيته حالقها ومش حالقها _ ممكن مستخدم الشفرات اللي عنده ماركة التمساح _... لابس بدله حقها 3 ليرات ....وقرافة ام ال3 بليره من عند سوق السكر.... وبقولنا انو اله شهرين جاي من مونتريال .....وبحلف اني شايفه على جسر النور بالهاشمي بستنى باص الجامعة يعني بشكل عام الزلمه ما بشتريه بقرشين.
    ما شفت برهوم الا فقع من الضحك و أنا ما قدرت امسك نفسي ....قال الاستااااااذ اياد ليش بتضحكو...ضحكونا معكم.
    قلناله والله بنضحك لأنو مش مصدقين انو صحتلنا هيك فرصه....وشكرا الك استاذ اياد عالثقة الغاليه.

    على العموم بكرة من طي... الصبح بنكون عندك.

    وتم التسليم على الاستاذ اياد بطريقة دبلوماسية وهنا انتهت علاقتي بكندا وما زال الأستاذ إياد (سفير كندا للنوايا الحسنه) إلى تاريخه بانتظار قدومنا للعمل لديه .
    مُشاطرة هذه المقالة على: diggdeliciousredditstumbleuponslashdotyahoogooglelive

    لا يوجد حالياً أي تعليق


      الوقت/التاريخ الآن هو 21/11/2018, 07:57